تعالوا نبني مصر

بسم الله الرحمن الرحيم

تعالوا نبني مصر

حد فينا سأل نفسه الاسئلة دي !!

   يعني اية دولة ؟؟ وايه هيا سلطاتها ؟؟ ومين مصدر السلطات دي ؟؟ واذا كان الدستور هو اللي بيحدد السلطات دي وعلاقتها ببعض .. فـ يعني اية دستور وازاي بيحدد العلاقة بين السلطات وايه اللي المطلوب يكون عليه الدستور الجديد ؟؟

   طيب ايه الانظمة السياسية الموجودة في العالم ؟؟ واحنا عاوزين مصر يكون نظامها إيه ؟؟

   تظام ملكي والا جمهوري ؟؟ نظام رئاسي والا برلماني والا مختلط بين الاتنين ؟؟ نظام رأسمالي والا اشتراكي والا مختلط ولا نعمل بالاقتصاد الإسلامي ؟؟ وقبل دة كله عوزينها دولة مدنية والا دينية ؟؟

   طيب بعد ما نجاوب على الأسئلة اللي فوق دي نكون جاهزين نبني مصر السياسية الجديدة ؟؟

   لأ .. فاضل خطوتين

   الأولى: اننا نعرف التيارات السياسية وكل تيار أو حزب افكاره اية وبرنامجه كمان ؟؟ يا ترى هوا ليبرالي والا علماني والا شيوعي والا اشتراكي والا رأسمالي ؟؟ يميني والا يساري والا وسط ؟؟

   التانية: ازاي نختار اللي هيمثلونا في المجالس الشعبية والمحلية ؟؟ وازاي نختار رئيس الجمهورية ؟؟ وعلى أساس ايه هننتخبهم ؟؟

يلا نجاوب الأسئلة بقى ومحدش يغش من ورقة اللي جنبه !!

أولاً : أساسيات بناء الدولة !!

   يعني اية دولة ؟؟

   الدولة ببساطة عبارة عن مجموعة من الناس عايشين على أرض واحدة بتجمعهم ثقافة وعادات واحدة او متقاربة وعلشان تكون الدولة دي صاحبة سيادة على أرضها لازم يحكمها ناس من أرضها

الدولة: شعب- إقليم- حكومة

   إيه هيا سلطات الدولة ؟؟

   أي دولة في العالم فيها 3 سلطات: سلطة تنفيذية، سلطة تشريعية، سلطة قضائية

  

   السلطة التنفيذية:

   هيا السلطة المسئولة عن تنفيذ أحكام القانون في البلد وكمان عمل خطة تمشي عليها الدولة من الناحية الإقتصادية والإجتماعية ( اللي بيسموها خطة أو برنامج الحكومة ) وكمان تيسير وقضاء حوائج الشعب .. وتشكيلها بيبقى: رئيس الجمهورية أو الملك - الحكومة - المحافظين - مجالس المدينة والأحياء والقرى

   السلطة التشريعية: ( دور تشريعي - دور رقابي )

   ودي دورها صياغة الدستور والقوانين واقرار اللوائح المعمول بيها في البلد وكمان التصديق على المعاهدات الدولية اللي بيبرمها رئيس الجمهورية، مش كدة وبس دة ليها دور رقابي مهم جدا ولا يقل أهمية عن رسمها للقوانين وهو رقابة السلطة التنفيذية يعني الحكومة في تنفيذها لخطتها ورئيس الجمهورية ومحاسبتهم سياسياً عن أي أخطاء تحصل منهم .. وتقدر تسحب الثقة من الحكومة في أي وقت طالما الحكومة مش شايفة شغلها صح .. وعندنا في مصر السلطة التشريعية ( البرلمان ) مكون من مجلسين الشعب والشورى

   الحقيقة احنا مش محتاجين مجلس شورى في مصر لأنه موجود بس في الدول الاتحادية اللي زي أمريكا .. وبيبقى فيه أشخاص ممثلين عن المحافظات أو الولايات واللي بتعتبر دول في حد ذاتها لكن تابعة لدولة الإتحاد أو الدولة الأم .. وكل اللي بيعمله مجلس الشورى في مصر انه بيكلفنا ملايين الجنيهات .. للأسف

   السلطة القضائية:

   المحاكم بكل أنواعها ودرجاتها .. ودي دورها تطبيق أحكام القانون على وقائع القضايا اللي قدامها وغير ملزمة بتنفيذ الأحكام اللي أصدرتها لأن المكلف بالتنفيذ مييييييييين ؟؟ السلطة التنفيذية

السلطات: تنفيذية - تشريعية – قضائية

   مين مصدر السلطات في الدولة ؟؟

   الشعب يا جماعة هو مصدر السلطات في الدولة .. انا وانتا وانتي واحنا كلنا اللي بندي الحكومة سلطتها والرئيس كمان وقبلهم البرلمان

مصدر السلطات الشعب

  

   يعني إية دستور ؟؟

   الدستور دة يا جماعة هو القانون الأساسي للدولة وهو اللي بيحدد حقوقنا وواجباتنا كشعب وكمان بيحدد نظام الحكم في الدولة وسلطاتها وعلاقات السلطات التلاتة دي اللي اتكلمنا عليهم ببعض يعني مين بيراقب مين ومين بيحاكم مين سياسياً وجنائياً !!

عرفنا بقى أهمية الدستور

ثانياً : الأنظمة السياسية !!

   أول حاجة كدة .. عاوزينها دولة دينيه ولا دولة مدنية ؟؟

   يعني ايه دولة دينية: يعني دولة الحكم فيها لرجال الدين .. يقولونا اعملوا كدة علشان ربنا عاوز كدة وما تعملوش كدة علشان دة حرام .. أمثلة الدول الدينية في العالم إيران والفاتيكان

  طيب يعني اية دولة مدنية: يعني الحكم فيها لناس مدنين عاديين زيي وزيك .. وقت ما يغلطوا في حاجة نقدر نحاسبهم من غير ما يقولولنا دة المشروع الاقتصادي دة موحى بيه من ربنا سبحانه وتعالى .. ومرجعيتها في التشريع مصلحة الدولة بس

   طيب الإسلام قال إية في الموضوع دة: الدولة في الإسلام مدنية مش دينية ومرجعيتها في التشريع الشريعة الإسلامية اللي أهم مبادئها مصالح الناس .. والدليل على مدنية دولة الإسلام إن الرسول صلى الله عليه وسلم لما بنى أول دولة في الإسلام كانت في المدينة المنورة كإقليم والمسلمين مهاجرين وأنصار واليهود والنصارى اللي عايشين في المدينة مع اخواتهم في الوطن من المسلمين وكان الحكم شورى بين الرسول علية الصلاة والسلام مع الصحابة وبالشريعة الإسلامية اللي ادت حقوق النصارى واليهود كاملة وما نقصتش منها حاجة

   استنى هنا !!

   بس انتا قلت إن إيران دولة دينية ودي دولة إسلامية .. يبقى إزاي تقولنا إن دولة الإسلام مدنية ؟؟

   لأن إيران بيحكمها المذهب الشيعي .. وهما بيؤمنوا بمبدأ ( الإمامة وولاية الفقيه ) ودة مش موجود عند المسلمين السنة .. ومصر والحمد لله دولة سنية يبقى مفيش قلق من أن يبقى فيه في مصر خوميني فوق الرئيس .. وصلت كدة !!

عاوزينها مدنية بمبادئ الشرعية الإسلامية

   نظام ملكي والا جمهوري ؟؟  

   لا خلاااااااااااص .. انتهى عصر الملكية في مصر بخلع مبارك من حكم مصر .. ولازم مصر تبقى جمهورية وجمهورية حقيقية كمان .. مش جمهورية مبارك وأولاده

نظام جمهوري طبعا

   طيب عاوزين النظام رئاسي والا برلماني والا مختلط ؟؟

   يعني اية نظام رئاسي: نظام بيدي للسلطة التنفيذية سلطات واسعة وبالتحديد رئيس الجمهورية بيبقى ليه صلاحيات كتيرة جدا جدا جدا لدرجة انه بيركز كل صلاحيات السلطة التنفيذية في ايد الرئيس دة .. وللأسف عندنا النظام دة بيحول الحاكم من إنسان لفرعون رسمي .. والمثال الواضح للنظام الرئاسي نظام الحكم في أمريكا

  طيب يعني ايه نظام برلماني: النظام البرلماني بقى بيدي البرلمان صلاحياته العادية جدا وفي المقابل بيخفض صلاحيات رئيس الجمهورية أو الملك زي النظام البرلماني في انجلترا .. ملكة انجلترا تملك ولا تحكم .. وزي النظام البرلماني في إيطاليا .. البرلمان هناك مقطع بيرلسكوني رئيس الوزارء بتاعهم

   طيب يعني ايه نظام مختلط: دة بقى نظام بين البنين يعني بيدي صلاحيات واسعة لرئيس الجمهورية وفي نفس الوقت صلاحيات كاملة للبرلمان في محاسبة الرئيس سياسياً والسلطة التنفيذية كلها من حكومة لمحافظين يعني مش بيعتقوا الوزراء ولا الرئيس .. زي نظام فرنسا

الأصلح لمصر البرلماني أو المختلط مع تخفيض صلاحيات الرئيس برده

          

   النظام الإقتصادي رأسمالي والا اشتراكي والا اسلامي ؟؟

   النظام الرأسمالي: دي يا سيدي بيشيل ايد الحكومة بنسبة كبيرة من حكاية التعيين وتشغيل الشباب وبيفتح الباب للإقتصاد الحر والشركات  الخاصة هيا اللي تشتغل وميزته إنه بيديك مرتبات خرافية وكبيرة تعيشك عيشة ميسورة ومرتاحة جدا ( دة المفروض ) .. في المقابل إنتا كمواطن مش من حقك تقول للحكومة إعملي لي لأنها من الأول قايلة لك أنا مش هاعمل حاجة غير رسم السياسات للقطاع الخاص .. زي امريكا !!

   النظام الإشتراكي: الحكومة هنا عاملة زي بابا وماما مسئولة تاكلك وتشربك وتشغلك .بس هنا مش هتاخد مرتبات كبيرة اوي وبالكتير هتعيشك عيشة كريمة .. ومعظم الناس في النظام دة بيبقوا موظفين عند الحكومة لأن الحكومة بتدي القطاع العام كل المزيا وبتخفض مزايا القطاع الخاص قصاد القطاع العام .. الدولة هنا بتبقى مسيطرة على الاقتصاد تماماً .. زي الصين !!

   رأي الإسلام: الإسلام جه قبل الرأسمالية والاشتراكية .. والإتنين أخدو منه والإقتصاد الإسلامي منفتح تماماً وقابل للتطبيق على أي كيفية سواء الاشتراكية من حيث سيطرة الدولة على السوق أو الرأسمالية من حيث تحديد ورسم السياسات العامة وعدم التدخل إلا لمراقبة الفساد والغش والمغالاة .. وكل اللي بيمنعه الإقتصاد الإسلامي عدم المتاجرة فيما حرم الله زي الخمر والخنزير .. بس دة للمسلمين بس .. أما غير المسلمين من حقهم يتاجروا في الحاجات دي لأنها مش حرام عندهم

   وبما إن دستورنا بيقول إن مبادىء الشريعة الإسلامية هي المصدر الرئيسي للتشريع .. يبقى نطبق نظريات الإقتصاد الإسلامي واللي حمت لغير المسلمين التجارة فيما حرمت الشريعة الإسلامية .. وكمان لأنه نظام مشترك بين الاشتراكية والرأسمالية .. فنرضي الشعب اللي معظمه باصص للحكومة إنها أمه أو أبوه .. وكمان نساعد رجال الأعمال يشتغلوا .. ونراقبهم بسياسات مرنه !!

وبكدة نكون حققنا النفع للناس والدولة

  

  

ثالثاً : التيارات السياسية !!

   يعني إية يميني ويساري ووسط وعلماني وليبرالي؟؟

   دة نموذج لمصطلحات عمالين نسمعها من ساعة ما الثورة نجحت بفضل الله، وللأسف الشديد كلها عاملة زي سلك الكهرباء ( العوريان ) مع الشعب .. رغم إن كل مصطلح منهم ليه مزاياه وليه عيوبه .. ومفيش ولا نظام في دول نظام كافر ولا الكلام الفاضي اللي صدعنا منه الأيام اللي فاتت

   حزب يميني: دول الأحزاب اللي بتبقى ليهم مرجعية دينية .. زي الإخوان المسلمين في مصر وزي الحزب المسيحي الاشتراكي في ألمانيا

   طيب حزب يساري: دول بقى الأحزاب اللي بتحمل الفكر الاشتراكي .. زي التجمع والناصري والكرامة هنا في مصر والحزب الاشتراكي في فرنسا

   اما أحزاب الوسط: بيبقى بين بين لا هوا يميني ولا يساري بياخد من المنهجين وأهم حاجة عند النوعية دي من الاحزاب مصلحة الناس والبلد باي طريقة بقى

   نشوف بقى الليبرالية: دي بقى نوعية الأحزاب الرأسمالية في أغلبها لأن فيه أحزاب اشتراكية ليبرالية .. وكلمة ليبرالية جاية من كلمة "Liberation  " يعني تحرير او حرية .. ودي أحزاب بتفكر في مصلحة الناس والبلد بدون وضع أي قيود على أي فكر مطروح بما فيهم القيود الدينية .. لكن في مصر المواطن المصري متدين بطبعه وهوا بيصيغ أي قانون بيحط الدين في ماغه .. وعلى العموم ما دخل الدين شيئاً إلا زانه

   نختم بقى بالعلمانية: كلمة علمانية جاية من كلمة علم .. والأحزاب العلمانية و العلمانيين بيعتمدوا على العلم اعتماد مطلق في أفاكرهم من غير ما يتقيدوا بالدين برده .. لكن مش معنى كدة إنهم كفرة لا سمح الله .. الأديان كلها حثت على العلم والأخذ بالأسباب وكل فريق من اللي قلناهم ليه مزاياه وليه عيوبه

وبكدة وضحنا شوية مصطلحات مصدعنا حبتين

   يعني إية ديمواقراطية ؟؟

   الديمواقراطية كلمة يونانية مكونة من شقين ( ديموس = حكومة ) و ( كراتوس = الشعب ) .. وبكدة نكون فهمنا إن الديموقراطية هيا حكومة الشعب وإن الشعب هو اللي هيحكم نفسه بنفسه والتعريف الجديد يضاف ليه جملة أن الشعب يحكم بنفسه بنفسه عن طريق إنتخاب بعض أفراده للقيام بمهام الحكم .. وتتساوي الديمواقراطية مع مبدأ الشورى في الإسلام، إننا نسمع رأي بعض وننفذ الأصح والأصلح لينا

حكومة الشعب

   وازاي نمارس الديموقراطية ؟؟

   أما عن ازاي نمارس الديموقراطية .. إن كل واحد فينا يقول رأيه بمنتهى الصراحة والوضوح ويدافع عنه بدون تجريح في حد أو في فكرة حد .. يعني نسمع بعض ونتفق على أفضل حل وأفضل طريقة نحكم بيها البلد .. وما نزعلش من بعض أبداً طالما كلنا بنسعى ونفكر لمصلحة البلد .. مش نقعد نشتم بعض ونزايد على بعض ونخون بعض .. دي بقى اسمها قلة أدب مش ديموقراطية خالص !!

إحترام أراء الآخرين وتنفيذ أفضل الأراء

أخيراً  : الأساس اللي هـ نختار عليه الريس وأعضاء البرلمان !!

   بالنسبة لأعضاء البرلمان وللرئيس كمان:

   البرنامج يا جماعة هو اللي يحكم إختيارتنا للي هيمثلونا في البرلمان واللي هيحكما كرئيس .. لكن العواطف جابتنا مليون سنة ورا

   الأحزاب تقولنا برنامج عملها إية .. يعني هتعمل إية في الأربع خمس سنين اللي هتقعدهم في الحكم إذا نجحت .. هتعلاج مشاكل البطالة إزاي والمرتبات والمية والنور والغاز والتعليم والدستور والقوانين اللي بايظة دي والصحة الأكثر بوظاناً .. إذا إقتنعنا بالكلام اللي بيقولوه أهلا وسهلاً .. ما اقتنعناش نشوف غيرهم .. والرئيس كمان لازم يكون برنامجه واضح باليوم والساعة والدقيقة والثانية .. لازم أبقى عارف إن بكرة هوا هيعمل كذا والحكومة هتعمل كذا والمواضيع دي هتخلص يوم كذا

   ومجلس الشعب .. عاوزين يا جماعة مشرع مستنير .. ناس فاهمة خطورة وأهمية كل كلمة في القوانين اللي بيحطوها .. مش ناس عاوزة تتعلم القراية والكتابة من أول وجديد .. ويكونوا فاهمين إن دورهم مش خدمة الناس دة دور مؤسسات الحكومة والمجتمع المدني زي الأحزاب اللي هما تابعين ليها إنما دورهم الحقيقي إنهم يحطولنا قوانين تطلع البلد 100 درجة فوق ويراقبوا لنا الحكومة ويكشفوا فسادها لو فسدت ويسحبوا منها الثقة ويمشوها لو ثبت إنها حكومة عكاكة مش هتعرف تعمل حاجة .. وطبعاً يكونوا هما صالحين وذمتهم نضيفة

البرنامج والوعي وصلاح الذمم

وبكدة نكون انتهينا من عرض وجهة نظرنا عن كيفية بناء مصر القوية العظيمة بعد الثورة

وفقنا الله جميعاً

لما فيه الخير لمصرنا الغالية الحرة الأبية

مدونة الرئيس المصري

____________________ 

أهم الكلمات:

العودة لموضوعات قسم إدارة الأزمات، السلطة التنفيذية، السلطة التشريعية، السلطة القضائية، المؤسسات المجتمع المدني، المؤسسات الدينية، مدونة الرئيس المصري